मंगलबार, माघ २४, २०७९

काठमाडौं उपत्यकामा गएराति देखि स्मार्ट लकडाउन लागू

फ्ल्यासन्युज नेपाल२०७८ पुष २८ गते १०:४४

काठमाडौं । काठमाडौं उपत्यकामा कोरोना संक्रमण बढेसँगै स्थानीय प्रशासनले गए रातिदेखि स्मार्ट लकडाउन लागू गरेको छ । हिजो उपत्यकाका प्रमुख जिल्ला अधिकारीहरुको बैठकले रातीदेखि नै ‘स्मार्ट लकडाउन’ लागू गर्ने निर्णय गरेको हो । जिल्ला प्रशासन कार्यालय काठमाडौंले स्मार्ट लकडाउनका लागि १८ वटा आदेश जारी गरेको छ ।

त्यस्तै, ललितपुर र भक्तपुर प्रशासन कार्यालयले पनि फरक फरक विज्ञप्ति निकाली आदेश जारी गरेका छन् । स्थानीय प्रशासनहरुले सर्वसाधारणलाई अत्यावश्यक नपरी घरबाहिर ननिस्कन र सार्वजनिक स्थानमा जाँदा अनिवार्य मास्क लगाउन भनेका छन् । कोभिड महामारी सम्बन्धि स्वास्थ्य मापदण्ड अनिवार्य पालना गर्न, भौतिक दुरी कायम राख्न र साबुन पानीले बेलाबेलामा हात धुन पनि प्रशासनले आग्रह गरेको छ ।

यसैगरी, माघ ७ गतेदेखि सिनेमाघर र पार्टी प्यालेसलगायत सार्वजनिक स्थानमा जाँदा अनिवार्य खोप कार्ड देखाउन पनि आग्रह गरिएको छ । खोप कार्डको फोटो खिचेर मोबाइलमा राखे पनि हुने ब्यवस्था गरिएको छ । यस्तै, २५ जनाभन्दा बढी भेला नहुन पनि आग्रह गरिएको छ । औषधि लगायत अत्यावश्यक बस्तु तथा सेवा आपूर्तिमा कृतिम अभाव सिर्जना गर्ने, मूल्यवृद्धि गर्ने गरेमा कानुन बमोजिम कारबाही गर्ने पनि आदेशमा उल्लेख छ । सरकारले यस अघि नै माघ १५ सम्मका लागि विद्यालय बन्द गरिसकेको छ ।

नेपालमा कोरोनाको सक्रिय सङ्क्रमितको सङ्ख्या बढ्दै गएको छ । पछिल्लो केहीदिनयता सङ्क्रमितको सङ्ख्या दोहोरो अङ्कमा थपिन थालेसँगै सक्रिय सङ्क्रमितको सङ्ख्या पनि बढ्न थालेको हो । स्वास्थ्य तथा जनसङ्ख्या मन्त्रालयका अनुसार आज नेपालमा ९ हजार ५ सय २२ जना सक्रिय सङ्क्रमित छन् । जसमध्ये काठमाडौं उपत्यकामा मात्रै ५ हजारभन्दा धेरै सक्रिय सङ्क्रमित रहेका मन्त्रालयले जनाएको छ । हिजो नेपालमा २ हजार ४ सय ४४ जना नयाँ सङ्क्रमित थपिँदा काठमाडौं उपत्यकामा मात्रै १ हजार २ सय ९६ जना सङ्क्रमित थपिएका मन्त्रालयले जानकारी दिएको छ ।

तपाइँको प्रतिक्रिया