स्थायी न्यायाधीशका लागि सिफारिस भएका दुई न्यायाधीशको संसदीय सुनुवाइ हुने

काठमाडौं । सर्वोच्च अदालतको स्थायी न्यायाधीशका लागि सिफारिस भएका दुई न्यायाधीशको संसदीय सुनुवाइ प्रक्रिया शुरु हुने भएको छ ।

न्याय परिषदले रिक्त दुई न्यायाधीशका लागि उच्च अदालत पाटनका मुख्य न्यायाधीश कुमार चुडाल र उच्च अदालत सुर्खेतका मुख्य न्यायाधीश नहकुल सुवेदीको नाम सिफारिस गरेको थियो ।

सर्वोच्चको न्यायाधीशका लागि संसदीय सुनुवाइ हुनुपर्ने संविधानको व्यवस्था अनुसार सुनुवाइ हुन लागेको हो । परिषदको पत्रअनुसार सुनुवाइ प्रक्रिया अघि बढाउन लागेको सुनुवाइ समितिले बताएको छ ।

समितिले शुरुमा उनीहरुविरुद्ध सार्वजनिक सूचना जारी गरी उजुरी आह्वान गर्नेछ । उक्त उजुरीमा छलफलपछि सुनुवाइ थाल्नेछ । सुनुवाइ समितिबाट अनुमोदन भएपछि उहाँहरुको नियुक्ति हुनेछ।