पूर्व सांसद उप्रेतिको ८७ वर्षको उमेरमा निधन

काठमाडौं । नेपाली कांग्रेसका पूर्वसांसद एव‌म समाजसेवी डाक्टर शंकरप्रसाद उप्रेतीको ८७ वर्षको उमेरमा निधन भएको छ।
‘डाक्टर बा’का नामले परिचित डाक्टर उप्रेती नागरिक आन्दोलनका अभियन्ता सञ्जीव उप्रेतीका पिता हुन। गएराति ११ बजे निधन भएका उप्रेतीको आज बिहान पशुपति आर्यघाटमा दाहसंस्कार गरिएको छ ।

२०४६ सालपछि उप्रेती कांग्रेसबाट ६ वर्षसम्म राष्ट्रिय सभा सांसद भएका थिए । डाक्टर उप्रेतीले ५० वर्षसम्म झापाको गाउँमै बसेर गरिब तथा असहायको निःशुल्क उपचार गरेका थिए ।

५ वर्ष सरकारी जागिर खाएका उप्रेतीले जागिर छाडेपछि ४५ वर्षसम्म झापामा बसेर सेवा गरेका थिए । २०१७ सालमा एमबीबीएस गरेका उप्रेती चिकित्सक मात्र नभएर प्रजातान्त्रिक आन्दोलनका अगुवा पनि हुन् ।

त्यसक्रममा उनी पटक पटक जेल समेत परेका थिए । उप्रेतीले लेखेको आत्मसंस्मरणको कृति ‘जीवन एक सपना’मा आफ्नो संघर्ष पूर्ण जीवनयात्रा समेट्नुभएको छ ।