शुक्रबार, असोज २१, २०७९

पहिलो चरणमा एक लाख ८४ हजारले लगाए कोरोना खोप

फ्ल्यासन्युज नेपाल२०७७ माघ २५ गते ९:५७

काठमाडौँ। पहिलो चरणको कोरोना भाइरस (कोभिड–१९) विरुद्धको खोप अभियान सकिएको छ। यस अभियानको पहिलो चरणमा एक लाख ८४ हजार ८ सय ५७ जनाले खोप लगाएका छन्।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार भारत सरकारले उपलब्ध गराएको खोप ‘कोभिशिल्ड’ देशभरका दुई सय एक खोप केन्द्रबाट एक लाख ८४ हजार ८ सय ५७ जनाले खोप लिएका हुन्।

जसअनुसार प्रदेश १ मा २४ हजार २२४, प्रदेश २ मा २५ हजार ६३७, वाग्मती प्रदेशमा ६३ हजार ३०८, गण्डकी प्रदेशमा १८ हजार ४७२, लुम्बिनी प्रदेशमा २८ हजार ९४१, कर्णाली प्रदेशमा ९ हजार ४२० र सुदूरपश्चिम प्रदेशमा १४ हजार ८५५ जना छन्।

मन्त्रालयले यही माघ १४ गतेदेखि पहिलो चरणमा कूल जनसंख्याका तीन प्रतिशतलाई खोप लगाउनेमध्ये प्राथमिकतामा परेका व्यक्तिलाई खोप प्रदान गरेको थियो। अभियान शनिबार सम्पन्न भएको हो। मन्त्रालयले पहिलो चरणका लागि ल्याइएका खोप प्राथमिकताका आधारमा अर्को चरणमा लगाउने भएको छ।

नेपालमा कूल जनसंख्याको ७२ प्रतिशतलाई खोप लगाउने सरकारको योजना छ। मन्त्रालयका प्रवक्ता डा गौतमले कुनै अवाञ्छित घटना नभई खोप अभियान सफलतापूर्वक सम्पन्न भएको जानकारी दिए।

नेपाललाई भारत सरकारले अनुदानमा १० लाख मात्रा खोप उपलब्ध गराएको थियो। यस्तै, चीन सरकारले पनि पाँच लाख मात्रा खोप उपलब्ध गराउने भएको छ।

तपाइँको प्रतिक्रिया